LAOAG CITY – Nasurok maysa a ribu a pampubliko a pagadalan ti nangitantan ti panaglukatda ti klase para iti School Year 2024-2025 inton Lunes, Hulio 29.
Inbatad ti Department of Education (DepEd) nga adda ti pakabuklan a 1,002 a pagadalan idiay Metro Manila, Ilocos Region, Central Luzon ken Soccsksargen Region ti saan a mangrugi ti klaseda inton Lunes.
Kangrunaan nga inbatad ti pagadalan kadagiti siudad ti Malabon, Pasig, Marikina, ken Valenzuela ket agpapada nga aglukat inton Agosto 5, 2024.
Kabayatanna, dua a pagadalan idiay Navotas City, lima idiay Manila, 13 idiay San Juan City ken 15 idiay Quezon City ti aglukat inton Agosto 5.
Immunan nga inbatad ni Presidente Ferdinand “Bongbong” Marcos Jr. idi Biernes a ti panaglukat ti klase inton Hulio 29 ket nasken a maituloy malaksid kadagiti lugar a nakaro a naapektaran ti Bagyo Carina ken Habagat.
