LAOAG CITY – Inbatad ni Dr. Josephine Ruedas, ti mangidadaulo ti Provincial Health Office a nagtalinaed a nakaisolate iti Ilocos Norte Provincial Jail dagiti 101 a balod a nagpositibo iti covid-19.
Inbatad na a karaman a nailockdown iti uneg ket dagiti personnel a dimmalan iti swab test.
Mainaig iti daytoy, kuna na a dagiti nagpositibo ket addaan ti saggaysa a kwarto tapno saan nga agdudupodop dagitoy, naipaayan da ti vitamis ken sumagmamano a food packs.
Innayun na nga adda metten ti nakiddaw a nayun a face mask, alcohol ken dadduma pay a medical kits para kadagiti balod.
Kabayatanna, inbaga ti doktor a manamnama a manayunan pay ti bilang ti agpositibo iti virus a balod gapu iti agtultuloy a swab testing ken gapu ta saan a maliklikan ti panagdudupodop iti uneg ti pagbaludan.
Nu pay kasta, mangnamnama nga iti kabiitan a panawen ket makarekobre metlaeng ti INPJ ken iti intero a probinsya manipod iti makapatay a virus.