LAOAG CITY – Inpakaammo ni PCapt. Kristian Lee Badua, Acting Company Commander ti 101st Maneuver Company, RMFB1 a nanayunan ti pondo a dara ti nasao a grupo.
Kuna na a daytoy ket kalpasan ti naiyuswat a bloodletting activity wenno ti naawagan a Dugong 101, Alay ng Kapulisan.
Inbatad na a daytoy ket babaen iti pannakaibinnulig ti Mariano Marcos Memorial Hospital and Medical Center iti siudad ti Batac ken nagduduma nga organisasyon.
Segun ken ni Badua, umabot iti 80 dagiti nakipagpartisipar ngem nasurok laeng a 50 a bag ti dara ti nakolektar.
Inpakaammo ni Badua a dagiti nakolektar ket naipondo iti blood bank ti 101st Maneuver Company iti MMMH&MC.
Kuna na a daytoy ti maitulong kadagiti agkasapulan ti dara ken masapol laeng nga agkiddaw iti opisina da.
Kabayatanna, inbatad ni Badua a malaksid iti certificate of appreciation kadagiti nakipagpartisipar iti panagidonar ti dara ket prayoridad dagitoy a maipaayan ti tulong nu bilang kasapulan.
Immunan nga inpakaammo ni Badua a mamindua agingga iti mamitlo a daras ti pannakaiyuswat ti blood letting activity iti tunggal tawen.
Malaksid iti blood letting activity ket karaman ti pabahay ken kangrunaan a tutokan pay dagitoy ti pananglaban ti insurhensya ditoy probinsya.
