LAOAG CITY – Natay ti 104 a Palestino gapu iti panangatake ti Israel idiay Gaza.
Daytoy ket basar iti health ministry kalpasan a naakusaran ti Hamas iti panangpapatay ti suldado.
Segun iti Israeli military, ti nasao a panangatake ket kas sungbat ti panaglabsing ti Hamas iti ceasefire deal nga inpursige ti Estados Unidos.
Inakusaran ti Israel’s defense minister ti Hamas gapu iti panangatakena idiay Gaza a nakatayan ti suldado ti Israel ken saan a panangtungpal iti linaon ti katulagan a panangisubli kadagiti bangkay dagiti hostages.
Nupay kasta, inpetteng ti Hamas nga awan ti pakainaiganda iti nasao a panangatake ken sumursurotda iti katulagan.
Naammoan a ti nasao a panangatake ti Israel ket nangitunda iti pannakadadael ti pagtaengan, pagadalan ken dadduma pay iti Gaza City, Beit Lahia iti amianan ti Gaza, Bureij ken Nuseirat iti sentro ken Khan Younis iti abagatan.
Mainaig iti daytoy, inpakaammo ti Gaza’s health ministry, adda ti pakabuklan a 104 nga indibidual ti natay pakairamanan ti 46 nga ubbing ken 20 a babbai idinto a sumurok 250 a dadduma pay ti nasugatan.
Immuna iti daytoy, inbilin ni Israeli Prime Minister Benjamin Netanyahu ti Israel Defense Forces a mangiwayat ti “forceful strikes” iti Gaza ngem saanna nga inrakurak ti rasonna.
