LAOAG CITY – Maragsakan ni Doctor Czarina Alcaraz, maysa nga obygyne iti panangaprubar ni Presidente Rodrigo Duterte iti 105-Day Maternity Leave.
Inbatad na a kalpasan a makaanak ti maysa a babai ket kasapulan na iti naan-anay a panaginana kangrunaan na dagiti aganak babaen iti Cesarian Section.
Malaksid ti daytoy, kuna na a masapol a mataripato a naimbag ti kaipasngay a maladaga kangrunaan na ket kasapulan a fulltime breastfeeding ti maysa nga ina.
Segun ken ni Alcaraz, umabot iti 18 a bolan ti kasapulan a panaginana ti maysa nga ina tapno naan-anay a mapasubli na ti napukaw na a pigsa bayat ti panagsikog na agingga a nagpasngay.
Innayon na a maragsakan da nga obstretician ken uray dagiti pediatricians a doktor dagiti ubbing iti pannaka-aprubar ti 105-day maternity leave tapno maipatungpal ti maysa nga ina ti fulltime breasfeeding ken ti panagrekobre na.
