LAOAG CITY – Balligi ti pannakaiyuswat ti sarch warrant operation iti Barangay Pila ditoy ciudad ti Laoag.
Nabigbig ti subject ti operasyon a ni Mr. Loreto Gulliermo y Gaoiran alyas Gundo, agtawen ti 54 ken residente iti nasao a barangay.
Ti search warrant ket inparuk-at ti Regional Trial Court, First Judicial Region iti Bauang, La Union no sadinno nakailanad a ti biruken dagiti otoridad ket maysa a caliber 22, maysa a caliber 5.56 revolver ken balbala.
Nakumpiskar met dagiti otoridad iti pagtaengan ni Guillermo ti 11 a bala ti caliber 22 nga adda iti durabox.
Naiget met a naglikudan ni Guillermo a kukua na dagiti nakumpiskar kenkuana, ken awan ti ammo na a rason a maiyuswatan ti operasyon nangruna ket awan met ti nakariri na wenno nakairamramanan na malaksid laeng iti pannakaibalod na iti uneg ti innem a bulan iti 2016 gapo iti panagtakaw.
Segun kenni Guillermo, no pudno a kukua na dagiti nakumpiskar ket saan na nga iwarang lattan daytoy.
Inpetteng na a sakbay ti operasyon ket adda ti maipagarop nga ummuna a nagtaray iti uneg ti pagtaengan da.
Kunana pay nga iti agdama nga estado ti panagbiag da ket saan na a kabaelan a makagatang ti ikotan na a paltog.
Mainaig iti daytoy, inbatad ti manugang ni Gulliermo a ni Chirstine Domingo a dagus met laeng a pimmanaw ti inakusaran da nga ummuna a simrek iti pagtaengan da
Kabayatanna, inbatad ni Barangay Kagawad Jaunita Ancheta nga awan met ti mamonitor na nga adda ti ikot a paltog ni Guillermo rason a nakigtot idi napaayaban nga imatangan ti operasyon.
Kunana a ti laeng ammo na a rekord na ket ti pannakaibalod na ken awan metten ti naipadpadanon kenkuana a madi nga aramid daytoy.
