LAOAG CITY – Positibo ti insayangkat ti Ilocos Norte Police Provincial Office (INPPO) a search warrant operation iti Barangay 26 ditoy ciudad ti Laoag.
Nabigbig ti subject ti operasyon a ni Remarton Ocampo y Argel, alyas Togo, agtawen ti 46, addaan ti live in partner, maysa a tricycle driver ken residente iti nasao a barangay.
Ti nasao a search warrant ket aggapo iti Office of the Executive Judge-RTC First Judicial Region idiay probinsya ti La Union gapo iti panagsalungasing na iti RA 10591.
Nakumpiskar manipud iti pagtaengan ni Ocampo ti 11 a sachet a naglaon ti maipagarop a shabu ken dua a plastic residue, drug paraphernalia ken maysa a kalibre 38 a paltog nga addaan ti lima a bala.
Mainaig iti daytoy, inakusaran ni Ocampo a naimula dagiti naala iti pagtaengan na nangruna ket maipagarop nga adda ti ummuna a simrek sakbay ti pormal nga operasyon.
Segun kenni Ocampo, bayat nga adda iti comfort room ket nadlaw na nga adda ti simrek ken idi simmirip ket nagderetso a napan iti uneg ti nasao nga indibidual.
Inlawlawag na nga idi naibaga nga adda ti search warrant kontra kenkuana ken maipagarop a ginuyod da ni Ocampo a rimuar, ngem nabati dagitoy ken sumagmamano a minutos pay laeng ti napalabas sakbay a rimuar dagiti ummuna a simrek iti balay da.
Kunana a kampante isuna gapo ta awan ti ammo na a madi nga aramid na.
Nakasagana met a dumalan iti drug test ni Ocampo tapno mapaneknekan nga awan ti aramid na, ken plano na nga ipa-finger print dagiti nakumpiskar a kontrabado.
Naamoan a ni Ocampo a datin a nabalod gapo iti pannakatiliw na ken nakarwar idi 2019.
Nagtalinaed iti kustodyar dagiti otoridad ni Ocampo para iti naan-anay a disposisyon.
