LAOAG CITY – Balligi ti nayuswat a search warrant operation iti pagtaengan ti maysa delivery rider iti Barangay 9 ditoy ciudad
Nabigbig ti subject ti operasyon a ni Edlino Clemente Jr., alyas Master, agtawen ti 36, maysa a delivery rider ken residente iti nadakamat a barangay.
Ti search warrant ket inparuk-at ti Regional Trial Court Branch 11 ditoy ciudad ti Laoag gapo iti panaglabsing ni Clemente iti Republic Act 9165.
Nakumpiskar dagiti otoridad iti cabinet nga adda iti kwarto ti pagtaengan ni Clemente ti 11 a sachet a maipagarop a naglaon ti shabu, ken maysa nga open plastic sachet.
Rumrumuar a ni Clemente ket maipagarop nga aglaklako ti iligal a droga ngem naglikudan na daytoy ken inpetteng na nga awan ti iligal nga aktibidad na wenno bisyo.
Iti biang met ti Philippine National Police, nabiit pay a nairaman ni Clemente iti listaan ti drug watchlist dagiti otoridad.
Mainaig iti daytoy, inbatad met ni Ms. Mae, ikit ti live in partner ni Clemente a nasdaaw da laengen idi parwaren ida dagiti pulis a naka-iggem ti paltog ken rumrumuar nga adda pay ti induron dagitoy nga ubing.
Kunana a nakigtot da gapo ta nagik-ikkis ti kaanakan na ken inayaban na daytoy ken idi rumuar ket nakita na nga addan ti tao iti uneg ti pagtaengan ti subject ken maipagarop nga idurduron da pay ti apoko na.
Inpetteng na nga inbaga na a saan da a mabalin a sumrek no awan ti barangay officials ngem maipagarop nga adda met ti ummuna a personnel iti uneg ti pagtaengan ti subject ken daytoy ket naka-gray ken nakashorts.
Patien ni Mae a dagiti naala iti pagtaengan ni Clemente ket inmula dagiti otoridad.
Kabayatanna, inpetteng ni Barangay Kagawad Cherry Bugaoisan, Chairman ti Peace and Order nga awan ti ammo da a rason no apay a naiwayatan ti operasyon ni Clemente ken nasdaaw da laengen idi napaayaban da tapno agwitness.
Kunana a plano da pay nga alaen kas barangay tanod ni Clemente iti barangay da gapo ta agkurkurang dagitoy.
Nupay kasta, inbatad na a rumbeng laeng met a sangwen ni Clemente no anya ti nagbasolan na.
Iti agdama, nagtalinaed iti kustudiyar Philippine National Police ditoy ciudad ti Laoag ken maisagsaganan ti kaso a mapila kontra iti daytoy.
