LAOAG CITY – Kinumpirmaran ni Mr. Cipriano “Perry” Martinez, Acting General Manager ti Ilocos Norte Electric Cooperative wenno INEC nga adda ti 11 nga empleado ti kooperatibada ti napatawan ti preventive suspension gapu iti maanomalya a meter reading.
Segun kenkuana, daytoy ket kabayatan a maiwaywayat ti naun-uneg nga imbestigasion mainaig iti mapaspasamak a maanomalya a meter reading ditoy probinsia.
Inbatadna a masapul a mapagsungbat dagiti mapaneknekan nga adda ti basolna gapu ta saan nga iti Ilocos Norte Electric Cooperative ti kangrunaan nga agsagrap no diket dagiti mismo a member-consumer-owner ti kooperatiba gapu ta maibilang daytoy a takaw a kuriente ken maikabil iti system loss a mainayon a 4% iti kada kilowatt a bayadan ti tunggal member-consumer-owner.
Inlawlawagna nga iti agdama ket nagsardeng ti operasion ti meter reading ti Area 2 ti Ilocos Norte Electric Cooperative a pakairamanan iti ili ti Bacarra, ditoy siudad ti Laoag ken dadduma pay a Local Government Unit.
Kunana a makapadanag daytoy a naduktalanda nga anomalya iti pannakaisayangkat ti meter reading isut gapuna a kasapulanda nga ikorehir daytoy a biddot.
Maipalagip a nagkamang ditoy Bombo Radyo Laoag ni Mr. Pepito Palanggoy a residente iti Barangay Calioet-Libong iti ili ti Bacarra gapu ta agtultuloy nga adda ti electric bill-na iti laksid a naperdi ti kuntadorda.
Immuna iti daytoy, nakapungtot ni Martinez iti naduktalanna ken ibilangna a maysa manen nga anomalya daytoy ken arig saanen nga Acting General Manager ti akemna no diket janitor gapu ta isunan ti mangdaldalos ti problema iti napalabas nga administrasion.
