LAOAG CITY – Umabot iti 11 nga indibidual ti naitaray iti ospital gapo iti panagdinnungpar ti pick-up ken pampasahero a bus nga addaan ti ruta a Laoag-Vigan ken nakairamanan ti kotse ken dump truck iti Barangay 16 iti ili ti San Nicolas.
Daytoy ket basar iti inisyal nga impormasyon a nakalap ti Bombo Radyo Laoag manipud kenni Ms. Rian Simon, ti mangidadaulo ti Municipal Disaster Risk Reduction and Management Office iti ili ti San Nicolas.
Segun kenni Simon, uppat ti ummuna a naitaray iti ospital ken simmaruno dagiti pito a pakairamanan ti pito a nataengan ken dua nga ubbing.
Iti inisyal nga impormasyon, ti bus ket agpaabagatan ken agturong iti ciudad ti Vigan idinto a ti pick-up ket agpaamyanan agingga a napasamak ti desgrasya.
Gapo iti kapigsa ti impact ti napasamak, nairaman ti kotse ken dump truck a sumarsaruno iti pick-up.
Rumrumuar a napaspas ti taray ti pick-up sakbay ti insidente.
Kabayatanna, gapo iti desgrasya ket nangitunda ti nairot a trapiko manipud sentro agingga iti Barangay 16.
Agtultuloy met ti imbestigasyon ti Philippine National Police iti napasamak a desgrasya ken panangammo iti pakabigbigan dagiti biktima.
