LAOAG CITY – Natay ti 11 nga indibidual gapu iti malnutrition idiay Gaza basar iti Hamas-run health ministry.
Gapu iti daytoy, addan ti pakabuklan a 212 pakairamanan ti 98 nga ubbing ti pimmusayen gapu iti malnutrition iti lugar.
Segun iti health ministry, adda ti 38 nga indibidual ti natay idinto nga 491 ti nasugatan gapu kadagiti riribuk nga inwayat dagiti suldado ti Israel iti uneg ti 24 nga oras.
Mainaig iti daytoy, agtultuloy a ngumatngato ti bilang dagiti matmatay kagiddan ti anunsio a plano ti Israel a naan-anayen a sakupen ti Gaza banag a pagam-amkan dagiti residente.
Naammoan nga inaprobaran ti Israeli security cabinet ti baro a plano nga addaan ti lima a kondision para iti panagsardeng iti rinnupak idiay Gaza a maysa ditoy ti panangala wenno panangsakup iti nasao a lugar.
Rumrummuar a no matuloy iti nasao plano ti Israel ket mapattapatta a dumanon iti maysa a milyon a residente ti manamnama a maiyalokar nga agturong iti abagatan.
Kabayatanna, plano pay ti Israel a piliten a tumalaw ti agarup maysa a milyon a Palestinian nga agnanaed idiay Gaza City.
