LAOAG CITY – Balligi a natiliw dagiti 11 nga indibidwal pakairamanan ti maysa a barangay kagawad ken dati a Sang. Bayan Member gapo iti iligal a panagsusugal da iti Brgy. Alay, Badoc, Ilocos Norte.
Nabigbig dagiti suspek a natiliw nga isuda Don Garcia y Alegado, agtawen ti 60, naaswaan, mannalon ken residente iti Brgy. Balbaldez, Badoc; Bayani Rodriguez y Antiporda, agtawen ti 67, dati a Sangguniang Bayan Member iti nasao nga ili ken residente iti Brgy Garreta; Jerry Idica y Salvacion, agtawen ti 51, kagawad of Brgy. Labut; Rolando Pascua y Pascua, agtawen ti 32.
Karaman pay a natiliw dagiti bababi a da Eliza Aurellano y Maor, agtawen ti 78; Juanita Afuan y Santiago, agtawen ti 63; Kathleen Joy Palacpac y Ednilao, agtawen ti 30; Virginia Dahilig y Almazan, agtawen ti 59; Julita Cariño y Aurellano, agtawen ti 44; Presentacion Espejo y Yago, agtawen ti 51 ken ni Feliza Espejo y Pascua, agtawen ti 53,miembro ti 4P’s ken agpapada a residente iti Brgy. Alay iti nadakamat nga ili.
Basar iti PNP-Badoc, nakaawat da ti tawag a nangireport nga adda ti agsusugal iti nasao a barangay rason a dagus a nagturong dagiti pulis iti lugar ken ditoy a naaktuan da dagiti suspek nga agay-ayam ti tong-its.
Narekobre iti lugar ti tallo a set ti baraha, dua a pidaso ti one thousand peso bill, walo a pidaso ti five hundred peso bill, 12 a pidaso nga one hundred peso bill, 12 a pidaso a 50 peso bill ken 31 a pidaso ti twenty peso bill, lima a pidaso ti 10 peso coin, 14 a pidaso ti 5 peso coin ken 28 a pidaso nga one peso coin nga agdagop ti 7,618 pesos.
