LAOAG CITY – Umabot iti 111 a child laborer ti natulungan ti Department of Social Welfare and Development (DSWD) idi tawen 2022 ditoy Rehiyon 1.
Daytoy ti inbatad ni Lee Ann Rose Aragon ti Project Development Officer II iti Strategic Helpdesks for Information, Education, Livelihood and Other Developmental Services wenno ti SHIELD Program ti Department of Social Welfare and Development (DSWD).
Segun kenni Aragon, ti nasao a bilang ket nangatngato no ikumpara iti 100 a nairekord a naipaayan ti tulong idi tawen 2021.
Inbatad na a ditoy Ilocos Norte, umabot iti 1,028 a kaso tin a-profile ti Dept. of Labor and Employment a karaman iti child labor idi 2021.
Kunana a ti kangrunaan a rason no apay nga adda latta ti mairekrekod a child laborer ket gapo iti kinarigat wenno adda ti pinansyal a problema iti pamilya.
Mainaig iti daytoy, iyur-uray ti Department of Social Welfare and Development ti resulta ti profiling ti Dept. of Labor and Employment (DOLE) para idi tawen 2022 tapno maamoan ti datos ti child labor iti pagilyan.
Kuna ni Aragon a basar iti linteg, adda ti pannusa a maipataw iti employer no mapaneknekan nga adda ti empleado da a menor de edad no sadinno mabalin a mapaserraan ti establishimento, kasta pay dagiti nagannak.
Kabayatanna, inbatad na nga adda met dagiti interventions dagiti nagduduma nga ahensya ti gobierno tapno matulungan dagiti ubbing a ti laeng rumbeng nga aramiden da ket ti panangpokus iti panagadal.
