LAOAG CITY – Umabot ti 300 a Barangay Officials, Barangay Health Workers ken Sangguniang Kabataan ti nakipagpaset iti naisayangkat nga HIV wenno Human Immunodeficiency Virus Counselling ditoy probinsya.
Segun ken ni Department of Health Certified Counselor ken Presidente ti Philippine Nurses Association – Ilocos Norte Chapter a ni Mr. Jurgen Rushell Rapacon, daytoy ket kas paset ti panangitandudu kadagiti rumbeng nga aramiden pakaseknan ti HIV gapu ta bumabbaba ti tawen dagiti biktima iti nasao a sakit ditoy pagilian.
Inpakaammona a basar iti kaudian a nairuar nga Statistics idi bulan ti Hulyo ita a tawen ket umaboten ti 1,111 dagiti kaso ti HIV iti intero a pagilian iti uneg laeng ti maysa a bulan.
Inbatad ni Mr. Rapacon, nasurok-kumurang a 38 a kaso ti HIV tunggal aldaw rason a makapa-alarma daytoyen gapu ta umad-adu ti bilang ti kaso ti HIV.
Gapu iti daytoy, ginutigot ti DOH Certified Counselor ken Presidente ti Philippine Nurses Association dagiti amin a nagatendar iti nasao a Counselling nga agpa-test ken kitaen ti statusda.
Inpagunamgunamna a ti balay-pagagasan iti Siudad ti Batac ti kaasitgan a Treatment Hub kadagiti pasiente a positibo iti nasao a sakit a maaw-awaganda ti Person’s Leaving with HIV.
Inlawlawag ni Mr. Rapacon, basar iti pagalagadan ti DOH, no reactive iti Screening Test ket ikabilda iti Treatment Hub para iti Baseline Test nga ipatulodda ti dara iti San Lazaro Hospital para iti Confirmatory Testing nga urayen ti resulta iti uneg ti dua agingga uppat a lawas.
Inpagunamgunamna a maala ti sakit nga HIV babaen ti unprotected penetrative sex with HIV infected person, mother to child transmission ken infected blood.
Innayonna pay a maliklikan dagitoy babaen ti panangsurot ti acronym nga ABCDE nga Abstain, Be mutually faithful, Consistent and Correct use of condom, Do not abuse alcohol and Do not use drugs ken Educate yourself.
Mainaig iti daytoy, inpalgak ni Mr. Rodenver Mahor, HIV Proficient Med-Tech a ti kababaan a tawen dagiti biktima ti HIV ket sangapulo ket pito (17).
Inlawlawagna nga adda sangapulo ket walo (18) ti bilang dagiti naimaldit a positibo iti HIV ditoy Siudad ti Laoag idinto a sangagasut ket tallopulo ket walo (138) ti naimaldit iti intero nga Ilocos Norte.
