LAOAG CITY – Naipaayan ti cash assistance dagiti 112 a teenage mother wenno ubbing nga ina ditoy ciudad ti Laoag.
Daytoy ti inpakaammo ni Mrs. Janet Retamal, ti mangidadaulo ti Commission on Population ditoy ciudad.
Segun kenkuana, ti pannakaipaay ti tulong pinansyal kadagiti ubbing nga inna ket babaen ti Social Protection Program for Adolescent Mothers and their Children nga iyim-implementar ti City Population and Development Office.
Inlawlawagna a binolan a maipaayan ti tulong pinansyal dagiti ubbing nga inna ditoy ciudad tapno adda ti nayun ti igatang da ti kasapulan da.
Kabayatanna, inpasingked ni Retamal ti agtultuloy a panangsuporta da kadagiti teenage mother pakairaman dagiti annakda para iti napintas a masakbayan ken maituloy da dagiti arapaap da iti biag.
