LAOAG CITY – Umaboten iti nasurok 300 a bags ti bagas ti nairuwar ti National Food Authority ditoy Ilocos Norte kadagiti empleado ti gobierno para iti One-time rice assistance kadagitoy.
Daytoy ti inbatad ni Engr. Jonathan Corpuz, Branch Manager iti National Food Authority ditoy Ilocos Norte.
Segun kenni Corpuz, nangrugi da idi kalman a nagited kadagiti empleado ken agpatingga daytoy intono Mayo 19 no sadinno nakaawat dagitoy ti 25kg ti bagas iti tunggal maysa.
Karaman kadagiti naikkan idi kalman ket dagiti empleado ti DepEd-Ilocos Norte, DepEd-Batac, Philippine Fiber Industry Development Authority ken Bureau of Treasury.
Inlawlawag ni Corpuz a gapo iti limitado nga stock ti bagas ti iti National Food Authority ket maiyunan dagiti empleado iti National Agencies, State and University Colleges ken Military and Uniformed Personnel.
Inbatad na a daytoy ket gapo ta ti pondo a manipud iti Dept. of Budget and Management ket naideretso iti central office ti National Food Authority agingga a naited met ti listaan.
Mainaig iti daytoy, kunana a target da a maipaayan ti 11,280 nga empleado ti gobierno ti probinsya.
Kabayatanna, inbatad na a no mabunungan amin dagitoy ket adda pay ti 14,000 bags ti bagas nga isu ti buffer stock ti National Food Authority.
