LAOAG CITY – Umabot iti 1,162 nga ektarya a namulaan ti pagay ti naapektaran ti iduduprak ti bagyo Maring iti ili ti San Nicolas.
Daytoy ti inpakaammo ni Mayor Alfredo “Boying” Valdez iti nasao nga ili.
Inbatad ni Mayor Valdez a mangnamnama da nga 60-70 a porsiento kadagiti naapektaran a mula a pagay ket makarekobre met laeng.
Maipalagip a nalayos dagiti mula a pagay gapu iti panagtudtudo na gubuay ti bagyo Maring.
Naamoan nga umabot met iti pito nga ektarya a namulaan kadagiti nagduduma ti klase na a nateng ti nadadael gapu iti bagyo Maring.
Iti agdama, manarimaan ti panagvalidate ti Municipal Agriculture Office tapno maamoan no mano amin ti balor dagiti nadadael a mula a pagay ken nateng iti ili ti San Nicolas.
