LAOAG CITY – Kinumpirmaran ni Police Major Joseph Tayaban, ti chief of police ti Philippine National Police iti ili ti Badoc nga addan ti 12 a boga ti nakumpiskar da.
Segun kenni Tayaban, nakumpiskar da dagiti boga iti Barangay Bato manipud kadagiti ubbing ken dagiti us-usaren da ket dagiti napagsisilpo a lata.
Inlawlawag a gapo ta kaadoan kadagiti nakakumpiskaran da kadagiti boga ket ubbing, saan da a mapatawan ti multa.
Inbatad na a kalpasan ti panangkumpiskar da kadagiti boga ket dagus a madadael daytoy tapno saanen a mausar.
Kunana a katulungan ti pulisya dagiti barangay opisyal iti panagmonitor ken panagkumpiskar para iti kalikagom da a zero-incident bayat ti pannakaselebrar ti paskua ken baro a tawen.
Ummuna iti daytoy, inbatad na nga adda ti mandar ni Police Col. Julius Suriben, ti Provincial Director ti Ilocos Norte Police Provincial Office (INPPO) a kumpiskaren da dagiti boga ken nasken a maipatungpal ti saan a panaglako kadagiti maiparit a paputok.
Kabayatanna, nagballaag ni Tayaban kadagiti nagannak a bantayan da a nalaing dagiti annak da tapno maiyadayo dagitoy iti madi a pasamak.