LAOAG CITY – Umab-abot iti average a 12 a ribu a Pilipino ti matmatay gapu iti aksidente iti kalsada kada tawen.
Iti maysa a public briefing, kuna ni Health Spokesperson Albert Domingo a masansan a panagdinnungpar, madungpar ken dagiti agus-usar ti bisikleta ken motorsiklo ti makaigapu ti pannakatay dagiti biktima.
Inpadamag met ni Domingo a dagiti road traffic deaths iti pagilian ket ngimmato pay ti 7,938 idi 2011 ken nagbalin nga 11,096.
Kunana a kaaduan wenno 84% kadagiti biktima ket agpapada a lallaki.
Ti road accidents ti maibilang a maikawalo iti kangrunaan a mangitunda ti pannakatay iti intero a lubong.
Inlawlawag ni Domingo a ti gagem ti Department of Health ket mapasayaat ken mapapintas ti awareness, understanding ken attitude dagiti umili para iti road safety.
Inbatadna a target-da a makissayan ti road traffic deaths ti 35% apaman a madanon ti 2028 iti babaen ti Philippine Road Safety Action Plan ken ti Inter-Agency Technical Working group on active transport.
Innayonna a selselebraran ti Department of Health ti Road Safety Month ita a Mayo.
