LAOAG CITY – Maladingitan ni Mr. Arielle Sahagun a residente ti Brgy. Nagpatpatan iti ili ti Solsona kalpasan a natakaw dagiti 12 a sako nga irikda iti parbangon di kalman.
Segun kenkuana, saanna nga inpagarup a mapukaw wenno matakaw dagiti sinako nga irikda gapu ta nakadawyandan nga ikabil laeng dagiti sinako nga irik iti igid ti kalsada apaman a malpas ti apitda.
Inbatadna nga adda ti dua a suspek a nakalugan ti kurong-kurong ti posible nga akin-aramid iti nasao nga insidente.
Inlawlawagna a naala dagitoy iti nakaimuntar a Close Circuit Television camera nga asideg iti nakapasamakan ti lugar.
Nupay kasta, inpalgakna a saan unay daytoy a malasin gapu ta nasipnget ken nalidem rason a marigatanda a mangbigbig kadagiti suspek.
Gapu iti daytoy, kunana a dagusda nga inpakaammo iti Philippine National Police iti ili ti Solsona ti napasamak kadakuada.
Kunana a daytoy met ti umuna a gundaway a natakawanda ti sinako nga irik.
Innayonna nga aggatad ti 15 a ribu a pisos dagiti 12 a sako nga irik a natakaw.
Kabayatanna, naammoan nga idi Disiembre idi napan a tawen ket adda manen ti naipadamag kadakuada a 15 a sako nga irik ti natakaw nga asideg met laeng iti lugarda.
