LAOAG CITY – Umaboten iti 12 a tattao ti natay iti napasamak a nalawa a layos idiay Thailand.
Malaksid iti daytoy, adda pay ti 553,921 a balay ti naapektaran idinto a 13,000 a tattao ti napwersa nga agbakwit.
Basar kadagiti otoridad, walo a probinsya ti naapektaran iti nalawa a layos isut gapuna a namandar ti nagduduma nga ahensya ti gobierno para iti pannakaipaay a dagus ti tulong kadagiti naapektaran a residente.
Kabayatanna, dua nga ospital iti asideg ti probinsya ti Pattani ti nasuspenso ti operasyon na gapu iti panagsagsagana na iti layos tapno maliklikan a maperdi dagiti medical facilities da.
Inbilin metten ni Thai Prime Minister Paetongtarn Shinawatra kadagiti otoridad ti dagus a panagtignay ken panangtulong da iti amin a naapektaran ti nalawa a layos.
