LAOAG CITY – Inaprobaran ti House of Representatives ti 12 iti 48 a prioridad a gakat ti Legislative-Executive Development Advisory Council iti maikatlo ken maikapat a pannakaibasana iti uneg laeng ti 22 a session days iti umuna a regular session ti 20th Congress.
Daytoy ti inrakurak ni House Majority Leader Ferdinand Alexander “Sandro” Marcos.
Inbatad ni Marcos a pammaneknek daytoy iti panangtutok ti Kamara de Representantes iti adyenda ti reporma ni Presidente Ferdinand Marcos Jr. iti panangidaulo ni Speaker Faustino “Bojie” Dy III.
Karaman kadagiti naipasa a gakat ket adda ti pakainaiganna iti enerhia, edukasion, salun-at, buis, danum ken good governance.
Inaprobaran ti Kamara de Representantes ti 12 a Legislative-Executive Development Advisory Council a priority bills pakairamanan dagiti sumaganad:
1) EPIRA
2) Waste -to-energy bill
3) National Center for Geriatic Health
4) Amendments to the Gov’t Assistance to Students and Teachers in Private Education Act
5) Assistance to Individuals in Crisis Situations Act
6) Amendments to National Building Code
7) Blue Economy Act
8) National Reintegration Bill
9) Amendments to the Teachers Professionalization Act
10) Extension of the Estate Tax Amnesty Period
11) Department of Water Resources Bill
12) Amendments to the Bank Deposits Secrecy Law
Inlawlawagna nga inaprobaran metten ti Kamara de Representantes ti ₱6.793-T 2026 General Appropriations Act idinto a 32 a gakat ti agur-uray ti agbalin a tignay ti Senado.
Kuna ni Marcos, agserbi a tarabay kadagiti sumaruno nga aramiden ti Kamara de Representantes ti Legislative-Executive Development Advisory Council measures a direkta a mangsungsungbat kadagiti kasapulan dagiti umili.
Naammoan a dagiti lima pay a Legislative-Executive Development Advisory Council measures ket agur-uray laengen ti input manipud iti Committee on Appropriations ken iti Committee on Ways and Means.
Inpetteng ti House Majority Leader a ti nasao a lima a Legislative-Executive Development Advisory Council measures ket naawagan a “big structural reforms” manipud iti land use to immigration to scholarships.
Kabayatanna, manarimaan a maipadpadalan ti 15 a dadduma pay a Legislative-Executive Development Advisory Council items iti deliberasion kadagiti nagduduma a komite ti Kamara de Representantes.
