LAOAG CITY – Naragsak nga inpakaammo ni Mr. Richard Raralio, ti Branch Head ti Social Security System ditoy siudad ti Laoag a ballaigi ti pannakaiyuswat ti Run After Contribution Evader nga aktibidad nga indauloan ti Social Secruity Sytem ditoy siudad no sadino a maiyus-uswat iti kada maudi a kuarter ti tawen.
Segun kenkuana, ti naisayangkat a panag-surprise visit-da kadagiti dadakkel wenno babassit a pasdek negosio nga adda ti kooperasion dagitoy gapu ta ammoda metten nga adda ti nagkuranganda pakaseknan ti reporting dagiti enpleado ken ti kontribusionda.
Basar iti nasao nga ahensia, adda ti pakabuklan a 12 a naglabsing nga employers ken 72 nga empleado ken kagudua a milyon ti total amount of delinquency iti Run After Contribution Evader program.
Naammoan a kangrunaan a rason dagiti maseknan a pasdek-negosio a naduktalanda a nagsalungasing ket gapu iti dakkel a pannakalugida idi panawen ti pandemia.
Mainaig iti daytoy, naikkan dagiti maseknan ti 15 nga aldaw a pawayway nga epektibo ita nga aldaw tapno iplastar ken solbaren dagiti banag a sangsangoenda.
Kabayatanna, no saan dagitoy nga agtungpal ket mapatawanda ti maiyannatop a pannusa.
