LAOAG CITY – Inpasigurado ni PCol. Julius Suriben, ti Ilocos Norte Provincial Director nga ipaay ti kapulisan ti seguridad kadagiti umili.
Daytoy ket tapno maprebentaran dagiti madi a pasamak kangrunaan ti soap scam a mapaspasamak ditoy probinsya iti kallabes.
Immuna iti daytoy, kuna ni Suriben a dagiti nagwarwaras a damag maipanggep iti van a maipagarup a lugan dagiti scammers nga aglaklako ti sabon ket nasita iti ili ti San Nicolas.
Ipakaammo na a gapu ta awan dagiti nagreklamo a mabalin a na-scam ket naisyu laeng kadagitoy ti citation ticket ken nagmulta.
Kuna na a naala met ti nagan dagiti 12 a maseknan a natiketan ken naipatulod daytoy iti regional office ken Metro Manila para iti background check.
Inbatad ni Suriben nga iti agdama ket awanen dagiti maipagarup nga scammers ditoy probinsya ken nakaruar dan iti rehiyon uno.
Ginutigot na ti publiko nga agkamang iti otoridad nu bilang nagbalin a biktima ti scam.
Nagpalagip met ti provincial director a masapol a liklikan ti agiwaras ti palso a damag iti social media nangruna nu makaited ti alarma iti publiko.
