LAOAG CITY – Kinumpirmaran ni PCapt. Suerte Ubongen, chief of police iti PNP Vintar a 12 a tattao ti natiliw iti naiyuswat nga anti illegal gambling operation iti maysa a minatayan iti Brgy. Cabisuculan iti ili ti Vintar.
Segun ken ni Ubongen, namunganay ti pannakaiyuswat ti operasyon gapu kadagiti impormasyon a naipadanon iti PNP seknan iti nasao a panagsugal manipod pay itay napan a lawas.
Inbatad na nga iti panagresponde da ket naaktuan nga agay-ayam ti tong-its dagiti maseknan.
Nakumpiskar ti walo a ribo a pisos a pusta, lamisaan, baraha, ken monoblock chair a nausar iti panagsugal.
Innayun ti hepe a dua kadagiti natiliw ket barangay kagawad iti Brgy. Cabisuculan iti nasao nga ili.
Iti agdama ket maisagsaganan ti maipila a kaso a panagsalungasing ti PD1602 wenno illegal gambling law kontra kadagiti suspek.
