LAOAG CITY – Agngangabit ti biag ti saan a nababbaba ngem 120 a maladaga iti incubators kadagiti ospital iti Gaza iti pannakaibusen ti langis iti enclave.
Daytoy ti nagbalin a ballaag ni United Nations children’s spokesman Jonathan Crickx.
Immunan nga inrakurak ti Health Ministry ti Palestinian Territory a nasuruken a 1,750 nga ubbing ti natay iti Israeli strikes a naiyuswat kontra iti Gaza Strip kas panagisubbot da iti iraraot ti Hamas idi Oktubre 7 ita a tawen.
Gapu iti napasamak ket sumangsango dagiti ospital ti panagkurkurang ti agas, langis ken danom, saan laeng a para iti rinibu a nasugatan iti nasurok a dua a lawas a gubat iti Gaza ken Israel no di ket pakairamanan pay iti routine patients.
Mapagam-amkan a maputed ti kruyente a pakaalarmaan ti pito nga specialist wards iti Gaza a mangtartaripato ken mangag-agas kadagiti premature babies tapno matulungan dagitoy nga umanges ken mangipaay ti critical support.
