LAOAG CITY – Inrakurak ti Philippine Navy a dumanon iti 122 a Chinese vessels ti nakita iti West Philippine Sea iti baet ti fishing ban iti West Philippine Sea nga inpatungpal ti China.
Segun ken ni Navy Spokesperson for the West Philippine Sea Commodore Roy Vincent Trinidad, karaman kadagiti Chinese vessels a namonitor iti West Philippine Sea manipod idi Mayo 21 agingga idi 27 ket lima a Chinese Coast Guard vessels, 14 a Chinese Maritime Militia vessels iti Bajo de Masinloc; lima a Chinese Coast Guard vessels, 17 a Chinese Maritime Militia vessels iti Ayungin Shoal; maysa a Chinese Coast Guard vessels, 34 a Chinese Maritime Militia vessels ken maysa a PLAN ship, Pagasa Island; saggaysa a Chinese Maritime Militia vessels iti Kota ken Lawak Island; tallo iti Panata Island; dua a Chinese Coast Guard vessels ken dua a Chinese Coast Guard vessels iti Patag Island; dua a Chinese Coast Guard vessels, uppat a PLAN ships ken 30 a Chinese Maritime Militia vessels iti Sabina Shoal.
Nupay kasta, inlawlawag ni Trinidad a saan a binigbig ti Pilipinas ti maipatpatungpal a fishing moratorium ti China iti West Philippine Sea.
Iti kinapudnona, nanayunan pay ti panagpatrolya iti West Philippine Sea, Bajo de Masinloc kagiddan ti panangipatungpal ti external defense ken Comprehensive Archipelagic Defense Concept.
Kabayatanna, ti fishing ban ket kagiddan ti rakurak ti China nga arestaren ken ibalud ti 60 nga aldaw nga awan ti imbestigasion a makita dagiti mangngalap nga adda iti paset ti West Philippine Sea.
