LAOAG CITY – Maysa a pulis idiay Zambia ti naarestar kalpasan a pinaruk-atanna dagiti 13 a balod manipud iti pagbalodan gapu iti napalaos a kinabartekna.
Ti insidente ket napasamak iti Leonard Cheelo Police Post idiay Kanyama, Lusaka iti bigat ti Disiembre 31.
Nabigbig ti pulis a ni Detective Inspector Titus Phiri a maipagarup nga innala amin ti tulbek iti pagbalodan kadagiti kakaduana a nabartek met.
Basar iti report, linuktan ni Phiri ti pagbalodan dagiti lallaki ken babbai ken inbagana kadagiti balod a mabalindan a rummuar tapno saraboen ti baro a tawen.
Naammoan a dagiti balod ket sumangsango iti kaso a panangdangran, panagtatakaw ken dadduma pay a krimen a saandan a nagsubli kalpasan ti insidente.
Gapu iti daytoy, nangiwayaten ti Zambia Police Service ti naan-anay nga imbestigasion tapno makasubli iti pagbalodan dagiti nakalibas a balod.
