LAOAG CITY – Natiliw dagiti 13 a lallaki babaen ti anti-illegal gambling operation dagiti otoridad iti maysa a minatayan iti Brgy. Paltit iti ili ti Badoc.
Segun kenni Police Capt. Joseph Tayaban, hepe ti PNP Badoc, adda ti naawat da nga impormasyon nga adda ti agsusugal iti nasao a lugar rason a nangiyuswat da ti operasyon.
Dagiti suspek ket residente iti Brgy 18A, 18B, Paltit, Garreta, Canaam, Brgy. 11, ken agpapada nga addaan iti umno nga edad.
Nakumpiskar dagiti otoridad ti 4,400 a pisos, walo a lamisaan, sumagmamano a set ti baraha a nausar iti ay-ayam a Lucky-9 ken dadduma pay.
Inbunannag ni Tayaban nga immunan a binagbagaan na dagiti opisyal ti barangay nga awan kuma ti maiyuswat a panagsusugal ngem nakatiliw da idi rabii.
