LAOAG CITY – Naarestar ti maysa a drug surrenderee iti naisayangkat nga Anti-illegal Drug Buy-Bust Operation iti ili ti Nueva Era.
Segun ken ni Police Capt. William Sotelo, ti chief of police iti ili iti Nueva Era, ti subject ti operasyon ket ni Ismael Wasan, agtawen ti 33, naasawaan, awana ti trabaho ken residente iti Barangay Cabittauran iti nasao nga ili.
Inbatad ni Sotela nga adda iti 13 a sachet a naglaon ti maipagarop a shabu a mapatta-patta nga agbalor iti sumuruk-kumurang a 34 ribo a pisos ti nakumpiskar manipod iti suspek.
Kuna na nga adda dagiti rumrumuar a sayangguseng a nagsubli iti illegal nga aktibidad ti suspek isut gapuna a nangiyuswat da ti validation ken apaman a nakumpirmaran da ti report ket inwayatan dan ti operasyon.
Kinumpirmaran pay ni Sotelo a ti suspek ket kadwa na ti naarestar a drug courier iti ili ti San Nicolas ngem residente daytoy iti ili ti Dingras.
Kabayatanna, inrakurak ni Sotelo nga ado ti madamdamag da nga addaan iti illegal nga aktibidad iti ili ti Nueva Era isut gapuna a dagitoy ti manarimaan nga i-validate da a naimbag gapu ta narigat no agatiltiliw da lattan.
