LAOAG CITY – Mabalin a kissayan ti House prosecution panel ti bilang ti 13 a testigo daytoy mainaig iti P612.5 milyon a confidential funds ni Vice President Sara Duterte no umdasen ti ebidensia a maidatag iti Senate impeachment court.
Inbatad ni Manila 3rd District Rep. Joel Chua, Chairman ti House Committee on Good Government and Public Accountability a gagem ti panagkissay ti testigo tapno mapaalisto ti panangusig iti Article 1 ti Articles of Impeachment kontra ken ni Vice President Sara.
Iti babaen ti Article 1, naakusaran ni Vice President Duterte ti saan nga umno a panaggastos ti confidential funds nga umabot iti P612.5 milyon — P500 milyon manipud iti Office of the Vice President ken P112.5 milyon manipud iti Department of Education idi isuna pay laeng ti sekretario ti ahensia idi 2022 ken 2023.
Naammoan nga inton bigat ket iprisentar dagiti prosecutors ti dua nga opisial ti Commission on Audit (COA) ken maysa a custodian ti rekord ti Kamara de Representantes.
Gagem daytoy a maduktalan ti garaw ti pundo, matingiting no kasano daytoy a ginastos ken no na-liquidate ti nasao a gatad.
