LAOAG CITY – Umabot iti 136 a paltog ti nakumpiskar manipod kadagiti 15 nga operasyon ti Philippine National Police iti intero a rehiyon Uno.
Daytoy ti inbatad ni Police Major Divina Albino, ti pannakangiwat iti Philippine National Police – Region I.
Inlawlawag ni Albino a dagiti naisayangkat nga operasyon ket manipod iti Enero 1 agingga iti Enero 29 ita a tawen.
Segun kenkuana, manipod iti nasao a bilang ket 103 ti loose firearms idinto a dagiti dadduma ket para iti safekeeping.
Innayon na a ti kaadoan a nakakumpiskaran da ket iti probinsya ti La Union, sumaruno iti Ilocos Sur ken Pangasinan, no sadinno a kabassitan ditoy Ilocos Norte.
Kabayatanna, inpakaammo ni Albino a manipod iti nasao a period ket nakairekord met ti Philippine National Police iti 11 a shooting incidents iti intero a rehiyon uno.
Inrakurak na a manipod iti nasao a bilang ket uppat a pammaltog ti napasamak iti probinsya ti Pangasinan; 3 iti Ilocos Sur idinto nga agpada a sagdudua iti Ilocos Norte ken La Union.
Inpalgak na a lima kadagiti napasamak a shooting incidents ket manarimaan paylaeng ti naiget a panagimbestigar da ken inpasigurado na nga ar-aramiden da amin tapno masolbar dagitoy a kaso.
Iti sabali a bangir, kuna ni Major Albino a manipod metlaeng iti nasao a period ket nakaisayangkat ti Philippine National Police-Region 1 ti 138 nga anti-illegal drug buy-bust operation no sadinno a naarestar ti 157 nga indibidual a karaman iti illegal adroga.
Adda met ti nakumpiskar da a nasurok a 200 a milyon a pisos ti balor na a shabu ken marijuana manipod kadagiti naisayangakat nga operasyon ita a bolan iti intero a rehiyon uno.
