13th month pay, masapol nga ited ti employers kadagiti empleado iti kada tawen – DOLE Region 1

LAOAG CITY – Inbatad ni Mr. Justine Paul Marbella, ti Information Officer iti Department of Labor and Employment (DOLE) iti Region 1 a nasken nga ipaay dagiti employer ti 13^th month pay kadagiti empleado.

Kuna na a daytoy ket kas ti nailanad iti Presidential Decree 851.

Inbatad nga aniaman ti estado ti maysa nga empleado, regular man wenno contractual ket masapol a mairaman iti 13^th month pay.

Kuna na a kwalipikado pay nga umawat iti dyatoy dagiti addan maysa a bulan iti trabaho idinto a saan met a kwalipikado dagiti agak-akem iti managerial positions ngem agdepende kadagiti employers.

Immunan nga inpetteng ni Marbella a saan da nga agawat ti aniaman nga apela manipod kadagiti employers gapu ta masapol a masurot ti linteg ken maited ti karbengan dagiti empleado.

Inbatad na a masapol laeng met a maited a cash ti 13^th month pay ken saan a babaen iti aniaman a banag kas iti groceries wenno nagduduma a packages.

Innayun ni Marbella a dagiti saan a mangipaay ti 13^th month pay ket aglabsing iti General Labor Standards (GLS) ti DOLE.