LAOAG CITY – Kinumpirmaran ti Commission on Elections (Comelec) nga agpaisadig a para bise mayor iti ili ti Bacarra ti maysa kadagiti natiliw iti comelec checkpoint iti ili ti Badoc kalpasan a naduktalan nga adda ti karga iti lugan da a 14 a bala ti caliber 40 a paltog.
Immunan a binigbig ni Police Major Edward Santos, ti chief of police iti ili ti Badoc dagiti natiliw nga isuda Jorcon Victor Sales y Paz, agtawen ti 37, baro, negosyante, residente iti Brgy. 1 Sta. Rita iti ili ti Bacarra, nangiturong ti maysa a ford raptor ken ti kadwa na a ni Vincent Dancel, agtawen ti 23 ken residente iti Brgy. 20 San Miguel ditoy siudad ti Laoag.
Naamoan a ni Sales ti maibagbaga nga agkandidato a para bise mayor iti ili ti Bacarra.
Segun ken ni Santos, kabayatan a rumuar ditoy probinsya dagiti maseknan ket nainspeksyon ti lugan da iti comelec checkpoint no sadinno a nadawat ti OR ken CR ti lugan.
Iti pananglukat ni Sales ti kahon ti armscor ket naduktalan nga adda ti nakaipalaon a 14 a bala ti caliber 40.
Kabayatanna, inbatad ni Santos nga inpetteng ni Sales nga awan ti ammo na kadagiti naduktalna a bala ti paltog ken inpetteng na a binulod na laeng ti inusar na a lugan.
Nagtalinaed iti kustodyar dagiti otoridad dagiti suspek ken maipila ita a bigat ti reklamo a panaglabsing iti Republic Act (RA) 10591 wenno “Comprehensive Firearms and Ammunition Regulation Act” ken ti comelec gun ban.
