LAOAG CITY – Umabot ti 10 a landslides ti napasamak iti paset ti boundary ti Ilocos Norte ken Cagayan paset ti Barangay Pasaleng iti ili ti Pagudpud wenno ti maaw-awagan a Bantay Kalbaryo.
Daytoy ti kinumpirmaran ni District Engr. Maria Venus Torio iti First Engineering District ti Department of Public Works and Highways (DPWH).
Segun kenni Torio, napasamak ti panagreggaay ti daga itay laeng parbangon ken insigida a nagresponde da tapno mawaknitan ti nasao a kalsada.
Inbatad na a nupay umabot ti sangapulo ti naimaldit a landslide ket awan dagiti nasugatan wenno naapektaran malaksid laeng kadagiti saan a makalasat a lugan.
Kunana a katulungan da iti operasyon ket ti lokal a gobierno ti Pagudpud ken Dumalneg.
Kalpasan ti sumagmamano nga oras ket nalukatan ti kagudwa ti kalsada rason nga “one way” pay laeng ti idaldalyasat dagiti motorista.
Kabayatanna, kinumpirmaran ni Mayor Esterlina Aguinaldo iti Sta. Praxedes, Cagayan nga adda met ti uppat a landslide a napasamak iti ili da.
Segun kenni Aguinaldo, daytoy ket gapo pay laeng iti napigsa ken awan sarday na a panmagtudtudo sipud pay idi rabii.
Inbatad na a gapo iti daytoy ket dagiti laeng motorsiklo ti mabalin a makalasat ken no agtultuloy ti panagsardeng ti tudo ket mabalin amawaknitan dan ti nasao a paset ti nagaburaan a paset ti kalsada.
Ibilang pay ni Aguinaldo a “flashflood” ti napasamak iti ili da gapo ta naglipyas ti danom ti Langgangan river rason ti pannakaiyanod ti maysa a pagtaengan a kukua ni Mr. Miguel Maruquin iti Barangay Salungsong.
Nupay kasta, saan a naan-ano ni Maruquin gapo ta dagus a nakapuot ken naibakwit daytoy.
