LAOAG CITY – Umabot ti 822 a kandidato para ti barangay ken SK election iti ili a Dingras.
Daytoy ti inpakaammo ni Police Supt. Rely Arnedo, hepe ti PNP Dingras.
Manipud ti nasao a dagup, 55 kadagitoy ti kandidato iti kina barangay chairman, 444 ti kandidato ti barangay kagawad, 65 para ti SK chairman ken 258 para ti SK kagawad.
Inbutaktak ni Arnedo nga 14 kadagitoy a kandidato ti drug surenderee ken dimmalan iti Community Based Rehabilitation Program.
Mainaig iti daytoy, manarimaan ti pannakataming ti maiwayat a voluntary drug testing kageddan ti peace covenant intono Abril 26.
Innayon ni Arnedo nga awan pay ti nakita wenno nasita da a nagsalungasing iti paglintegan mainaig iti election.
