LAOAG CITY – Natiliw ti 14 nga indibidual gapu iti iligal a panagsusugal iti Brgy. Lapaz ditoy siudad ti Laoag.
Manipod iti nasao a bilang ket tallo ti babbai idinto a 11 ti lallaki nu sadino a maibilang ti dua a menor de edad.
Basar iti report ti PNP-Laoag, adda ti dimmanon a report seknan ti panagsusugal iti maysa a minatayan iti nasao a barangay.
Gapu iti daytoy, dagus a nagresponde ti kapulisan ket dita a naaktuan nga agay-ayam ti ‘pepito dagiti’ maseknan.
Naamoan nga addaan dagitoy ti taya a 20 agingga 40 a pisos.
Mainaig iti daytoy, rumrumuar a ti rason ti pangsusugal dagiti maseknan ket tapno adda laeng ti pagliwliwaan bayat nga agtudtudo ken adda ti minatay.
Kabayatanna, agtultuloy ti pannakabirok kadagiti dua a nakalibas a maipagarup nga agpada a miembro ti Iglesia ni Cristo.
