LAOAG CITY – Dumanonen iti 1426 a nagduduma a paltog ti naisuko iti Ilocos Norte Police Provincial Office sipod nangrugi ti election period para iti 2025 National and Local Elections.
Segun ken ni P/Col. Frederick Obar, Provincial Director ti Ilocos Norte Police Provincial Office, dagiti naisuko a nagduduma a klase ti paltog ket manipud kadagiti City ken Municipal Police Station ditoy probinsia.
Inbatadna a daytoy ket resulta iti pannakapaiget ti iwaywayatda nga operasion ken ti programa nga Oplan Katok kadagiti gun holders.
Inlawlawagna nga adda dagiti sumagmamano a kandidato para iti mapaspasangasangan nga eleksion ditoy probinsia ti nangisuko ti paltogda.
Mainaig iti daytoy, kadagupan iti nasao a bilang ket 14 a paltog ti nakumpiskar babaen ti police operation idinto ti 75 a paltog ket nai-surrender gapu ta expired lisensia dagitoy.
Malaksid iti daytoy, naammoan a dumanon met iti 1337 a paltog ti nai-safekeeping.
Inpakaammo pay ti Provincial Director a dagiti paltog a nausar ti krimen ket iyendorsarda iti Regional Security Civil Unit ti rehion uno.
Kabayatanna, dagiti paltog a nai-safekeeping ket agtalinaed kadagiti police station ditoy probinsia.
