LAOAG CITY – Inpakaammo ni Mayor Alfredo “Boying” Valdez Jr. iti ili ti San Nicolas a naipan iti babaen ti general community quarantine (GCQ) dagiti 15 a barangay iti nasao nga ili.
Kuna na a daytoy ket pakaibilangan ti Barangay 1 agingga Barangay 15 iti nasao nga ili.
Inlawlawag ni Valdez nga ado ti masakupan ti 500 meter radius manipod kadagiti barangay iti poblacion a nakairekord ti kaso ti covid-19 gapu ta assideg laeng dagitoy rason a 15 a barangay ti naipan iti GCQ.
Mainaig iti daytoy, inbatad na a ti Barangay 16 agingga iti Barangay 24 wenno dagiti rural barangays ket granular lockdown laeng ti maipatungpal kadagiti addaan ti kaso ti covid-19.
Kabayatanna, inpakaammo ti Mayor a dagiti laeng essential workers ti mapalubusan a rumuar idinto nga agtalinaed a nakalukat dagiti establisyimento iti nasao nga ili laketdi masurot amin nga health protocols.
Immunan nga inbaga ni Valdez nga agbayag ti pannakaipatungpal ti GCQ kadagiti 15 a barangay iti 14 nga aldaw.
Innayun na a naiget ti panagmonitor ken panagbantay ti iyimplimentar dagiti kameng ti PNP, BFP ken opisyal ti barangay kabayatan ti pannakaipatungpal ti GCQ.
Maipalagip a kellaat ti panagngato ti kaso ti covid-19 iti ili ti San Nicolas nu sadino a kaaduan kadagiti kaso ket agpapaay iti merkado publiko iti nasao nga ili.
