LAOAG CITY – Dumanon iti 15 nga agayan-ayat dagiti nanggundaway ti Mass Wedding iti ili ti Badoc kageddan ti pannakaselebrar ti Valentine’s Day.
Segun ken ni Mayor Maximo Cajigal, 18 ti tawen ti kaubingan a nagkasar idinto a 37 met ti kataengan.
Inbatadna a nagasat dagiti nagkallaysa ita nga aldaw mismo dagiti puso gapu ta saan a gagangay nga aldaw ti naituding a panagkasar dagitoy.
Inlawlawagna kadagiti nagkasar no kasano ti kinapateg ti panagtalek ti tunggal maysa tapno saan a maburak ti pundasion iti mabukel a maysa a pamilia.
Kunana a libre ti naisayangkat a kasar, ti pannakaipagna dagiti marriage certificate ken naipaayan ti regalo dagiti maseknan a baro a kasar manipud iti Local Chief Executive ken dagiti kameng ti Sangguniang Bayan iti ili ti Badoc.
