LAOAG CITY – Nangitugot ti House prosecution team ti 15 a karton dagiti dokumento mainaig iti maipagarup a confidential funds nga inparuk-at para ken ni Vice President Sara Duterte iti Senate impeachment court.
Dinakamat ni private prosecutor Atty. Lorna Kapunan ti 15 a karton kabayatan nga aw-awagan kas testigo ni Roderick Wamil, dati nga state auditor ti Commission on Audit (COA) Intelligence and Confidential Funds Audit Office.
Inbatad ni Kapunan a ti umuna a testigo ket mangipaneknek iti 845 nga acknowledgment receipts (ARs) para iti maikapat a quarter ti 2022 iti babaen ti Office of the Vice President (OVP).
Ti sumaruno a testigo ket mangipaneknek iti 3,664 a dokumento pakairamanan ti 3,617 acknowledgment receipts.
Inlawlawag ni Kapunan a dagiti dokumento ket dagiti liquidation documents nga insubmitir mismo ti Office of the Vice President ken ti Department of Education para iti P500 milyon a confidential funds ti Office of the Vice President ken P116.5 milyon a confidential funds ti Department of Education.
Iti Article 1 ti impeachment complaint nga ak-akusaran ni Duterte ti culpable violation of the Constitution, graft and corruption ken betrayal of public trust gapu iti maipagarup a sistematiko a saan nga umno a panagusar, panaggastos ken iregular a liquidation ti pakabuklan a P612.5 milyon a confidential funds ti Office of the Vice President ken Department of Education.
Kuna met ti depensa babaen ken ni Michael Poa a nakasaganada nga awaten ti listaan dagiti dokumento malaksid iti 845 nga acknowledgment receipts para iti Disiembre 21 agingga 31, 2022 gapu ta adda dagiti isyu pay a talantanen maipanggep kadagitoy.
