LAOAG CITY – Binisita ti Social Security System ditoy siudad ti Laoag ti 15 a pasdek-negosio iti siudad ti Batac ken iti ili ti San Nicolas babaen ti Run After Contribution Evaders Campaign.
Segun ken ni Mr. Richard Raralio, mangidadaulo iti nasao nga ahensia ti gobierno, adda ti pito a pasdek-negosio iti siudad ti Batac ti binisitada, maysa a carwash, uppat a retail industry ken dua a food services no sadinno 23 nga empleado ti naapektaran.
Inbatadna nga adda met ti walo a pasdek-negosio iti ili ti San Nicolas ti binisita ti grupoda, innem a retail industry, maysa a food service ken maysa nga architectural services no sadinno 19 ti naapektaran.
Inlawlawagna a dagiti kangrunaan a nalabsing dagiti maseknan nga employers ket ti saan a panangiparehistro kadagiti empleadoda, saan a panangi-report ti husto a bilang ti empleadoda, saan a panangipaay ti rekord ti pasdek-negosioda ken saan a panangipaay ti kontribusion dagiti empleadoda iti Social Security System.
Innayon ni Raralio nga insigida met a nagtungpal amin dagiti nasao nga employers kalpasan a nangipatulodda ti show cause order kadakuada a masapul nga agtungpalda agingga inton Agosto 15.
