LAOAG CITY – Umabot iti 15 a tattao ti natay iti baro nga outbreak ti Ebola virus idiay Democratic Republic of Congo.
Karaman kadagiti pimmusay ket uppat nga health workers.
Segun iti health ministry ti pagilyan, ti presensya ti virus ket nakumpirmaran pay iti pimmusay nga agtawen ti 34 a babai a masikog nga addan iti ospital sipud pay idi napalabas a bulan gapo iti kaadda ti sintomas kas iti nangato a gurigor.
Daytoy metten ti maika-16 nga outbreak iti makapatay a virus iti central African state nga addaan ti saan a nasayaat nga health services.
Inbatad pay ti ministry nga adda met ti 28 a mapagat-atapan a kaso iti nasao a sakit iti naudi nga outbreak iti central Kasai province.
Gutgutiguten met dagiti opisyal a mangipatungpal ti preventive measures pakairamanan ti kanayon a panagbuggo iti ima ken ti social distancing wenno panaggi-innadayo kadagiti high-risk areas.
Basar iti eksaminasyon, nadeterminar ti Zaire strain ti Ebola, manmano nga strain ngem maibilang a makapatay.
