LAOAG CITY – Plano ti Senado a kissayan ti 15% agingga iti 20% ti pundo ti Department of Public Works and Highways (DPWH) a mailatang koma para kadagiti infrastructure funds ti ahensia para iti tawen 2026.
Inbatad ni Senate President Vicente ‘Tito’ Sotto III, ti plano a panagkissay ket napagsaritaanda ken ni Committee on Finance Chairperson Sen. Sherwin Gatchalian.
Kunana a naikeddeng a kissayanda ti pundo ti kada proyekto ti Department of Public Works and Highways iti nagbaetan dagiti nasao a porsiento gapu iti maipagarup nga overpricing a nakita kadagiti naglabas a proyekto ti ahensia.
Daytoy ket kalpasan a naibutaktak dagiti overpricing dagiti district engineers ken sumagmamano nga opisial nga isu ti agbaybayad pay kadagiti ‘proponents.’
Naripar ni Gatchalian ti P10.3 bilyon a balor dagiti farm-to-market road projects a nangrugi kadagiti naglabas a tawen 2023 agingga iti 2024.
Kagiddan daytoy ket nagpanawagan ti Senado a mangiwayat ti imbestigasion mainaig kadagiti super health centers no sadinno a 300 ditoy ti naduktalan a non-operational.
Kabayatanna, naikeddeng nga isubmitir ti Senado ti committee reports manipud iti nagbalin a Senate Blue Ribbon Committee iti Department of Justice (DOJ), Independent Commission for Infrastructure (ICI) pakairamanan iti Office of the Ombudsman.
