LAOAG CITY – Inbaga ni Bombo International News Correspondent Ruby Tolentino Sanchez iti Sri Lanka a dagus a naisardeng dagiti tignay protesta a maiyus-uswat iti nasao a pagilyan kalpasan nga inwaragawag da Sri Lankan President Gotabaya Rajapaksa ken PM Ranil Wickremesinghe a bumaba dan iti pwesto.
Segun ken ni Sanchez, nakapungtot dagiti rinibo a residente iti Sri Lanka gapu iti mapaspasaran da a krisis no sadinno nga awanen ti magatang da a taraon, langis ken dadduma pay a kasapulan da iti inaldaw.
Gapu iti daytoy, nangiyuswat dagiti residente ti tignay protesta a nangitunda ti panangserrek ken panangpuur da ti balay ti presidente.
Inpakaammo ni Sanchez nga idi sinerrek dagiti demonstrador ti balay ti presidente ket adda ti nakali da iti lugar a 15 a milyon a dolyar.
Innayon na a saanda nga ammo no naglemmengan ti presidente ken prime minister.
Kuna na a ti presidente ket taga Amerika ngem saanna a mabalin ti agsubli gapu ta nairaman iti isyu a panagkunniber iti Sri Lanka.
Kabayatanna, inbatad ni Sanchez a sumagmamano a Pilipino idiay Sri Lanka a makapaspasar ti narigat a panagbiag ti manarimaan a maisagsagana dagiti dokumento da tapno makaawid da ditoy Pilipinas.
Basar kenkuana, adda ti inkari a tulong ti gobierno ti Pilipinas a ti kada maysa ket maikkan ti 300 a dolyar.
