LAOAG CITY – Agtultuloy ti rescue operations kalpasan ti pannakaarinebneb ti M/V Trisha Kirstin 3 ti Aleson Shipping Lines nga adda ti 332 a pasahero a nakalugan nga asideg iti Baluk-Baluk Island, Hadji Muhtamad, Basilan.
Adda ti 15 nga indibidual ti natay ken sumurok 200 ti naisalakan.
Basar iti report, naarinebneb ti Ro-Ro vessel agarup ala-1 ti parbangon kabayatan nga agturong idiay Jolo, Sulu manipud idiay Zamboanga City.
Simrek ti danum iti lower deck ken limned ti barko gapu iti napipigsa a dalluyong.
Inrakurak ni Basilan Gov. Mujiv Hataman a 223 a pasahero pakairamanan ti uppat a natay ket naiturongen iti Isabela City port.
Manarimaan a mangiwaywayat ti search and rescue operation ti Philippine Coast Guard, Philippine Navy, Philippine National Police ken dagiti lokal a bangka iti panagkalap.
Mainaig iti daytoy, inbatad ti maysa nga off-duty crew member, inpaay ti crew dagiti life vests kadagiti pasahero kabayatan a lumlumned ti nasao a barko.
Inlawlawagna a ti rason ti pannakaarinebneb ti baro ket ti naputed nga harness para kadagiti lugan iti barko.
Naammoan a daytoyen ti maikadua nga insidente ti Aleson Shipping iti lugar kalpasan a nauram ti M/V Lady Mary Joy 3 idi Marso 2023.
