LAOAG CITY – Inbatad ni PLt. Col. Rafael Lero, ti hepe ti PNP-Laoag a nagtalinaed iti kustodyarda dagiti 15 a lallaki a balligi a natiliw iti naiyuswta nga illegal gambling operation iti paset ti Brgy. 23 ditoy Siudad ti Laoag.
Segun ken ni Lero, naaktoan dagiti otoridad nga agay-ayam ti billiards nga addaan ti pusta dagiti maseknan.
Kuna na a naggapo dagitoy manipod iti nagduduma a lugar ditoy probinsya nu sadino a ti maysa a natiliw ket opisyal iti ili ti Bangui.
Nakumpiskar dagiti ramit a nausar iti panagay-ayam a kas ti Billiards’sticks, Billiards’ balls ken ti mapapati a bet money wenno ti maipagarup a nagbalin a tayada a 3,055 pesos.
Kabayatanna, inpetteng ni Juno Reyes a maysa kadagiti naarestar a kabayatan nga agay-ayamda ti billiards ket kellaat lattan nga adda dagiti pulis a nangtiliw kadakuada.
Inlawlawagna a saanda nga agsusugal wenno adda ti taya ti panagay-ayamda iti billiards ngem ketdi mannarimaan laeng ti panagsanayda para iti maiyuswat a tournament a maisayangkat idiay Candon, Ilocos Sur.
Kunana a kadagupan kadagiti natiliw, duada laeng ti nagay-ayam ti billiards idinto a dagiti 13 ket nagbuya laeng bayat nga agay-ayam dagitoy.
Nu pay kasta, immunan nga inpakaamo ni Lero a nabayagen a sipsiputan dagiti kameng ti PNP Intelligence Unit ti iligal a panagsusugal ditoy probinsya a pakairamanan ti nakatiliwan dagiti nasao a suspek.
