LAOAG CITY – Kinumpirmaran dagiti otoridad nga 15 a tattao ti natay ken 18 ti nasugatan kalpasan a nadiskaril ti tren iti funicular railway idiay Lisbon, Portugal.
Segun iti emergency medical service, lima kadagiti nasugatan ket nagsagaba ti nakaro a sugat idinto a dagiti 13 a pakairamanan dagiti ubbing ket nagsagaba met ti minor injuries.
Basar iti imbestigasyon, sumagmamano kadagiti tattao a napupok ket naisalakan metten dagiti otoridad.
Naamoan a karaman kadagiti pimmusay ket ganganaet ngem saan pay a nakumpirmaran no sadinno ti mismo a lugar dagitoy.
Mainaig iti daytoy, saan met pay a nadeterminar no mano ti karga ti tren idi napasamak ti insidente iti asideg ti Avenida da Liberdade.
Dagus met a nakipagladingit ni Portuguese President Marcelo Rebelo de Sousa iti pamilya dagiti biktima iti nadakamat a trahedya.
Kuna met ni Lisbon Mayor Carlos Moedas, nga agladladingit ita ti ciudad da gapo iti inawagan na a “tragic moment for the city”.
Manarimaan met ti iyus-uswat a naun-uneg nga imbestigasyon dagiti otoridad tapno maamoan no anya ti rason ti insidente.
Ti Glória Funicular a tren ket kabaelan na nga agkarga ti 42 a tattao no sadinno ket ti kangrunaan a paglugluganan dagiti bumisbisita iti Lisbon.
Ummuna a naglukat daytoy idi 1885 a kangrunaan a transportasyon idiay Lisbon.
