LAOAG CITY – Inpakaammo ni Mrs. Vanessa Abigail Dagdagan ti mangidadaulo iti Provincial Fishery Office nga addan ti pakabuklan a 150 a ribu a pisos iti kadagupan a gatad ti naapektaran gapu iti El Niño drought related incidents.
Segun kenkuana, daytoy a datos ket nai-report kadakuada iti maudi a paset iti bulan ti Marso agingga iti umuna a lawas ti Abril a nakairekordan ti extreme heat index ditoy Ilocos Norte.
Kunana a karaman kadagiti naapektaran ket dagiti 30 a fish cage operator manipod iti Brgy. Gabu ditoy siudad ti Laoag gapu iti salt water intrusion no sadino a napukawanda iti 50 a ribu a pedaso ti tilapia nga agbalor iti 100 a ribu a pisos.
Inbatadna a kadagupan kadagiti 80 a mangngalap iti intero a probinsia ket sumagmamano kadagitoy ket manipod iti ili ti Dingras ken iti ili ti Solsona.
Mainaig iti daytoy, kunana a dagiti dadduma a mangngalap ket nangisayangkat ti force harvest tapno mabenipisiaran pay ti tarakenda.
Malaksid iti daytoy, inrakurakna nga agtultuloy ti panangibunong ti opisinada iti technical services a mangitandudo ti good aqua culture practices.
Iti agdama, inbatadna nga adu pay laeng dagiti maidandanon a report iti opisinada ngem dagitoy ket i-validate-da pay laeng babaen iti Bureau of Fisheries and Natural Resources.
Innayonna a no idasig iti napalabas a tawen ket bimmaba ti bilang dagiti naapektaran gapu iti kinabara ti panawen.
