LAOAG CITY – Napalaos ti panagyaman ni Mrs. Lorna Dumlao, ti lola ti maladaga a manarimaan nga agpapaagas iti Mariano Marcos Memorial Hospital and Medical Center iti siudad ti Batac kadagiti agtultuloy a mangipapaay ti tulong kadakauada.
Segun kenkuana, addan ti dua a lawas ti apokona a matamtaming iti nasao nga ospital gapu iti sakitna a Brain Mass benign or malignant.
Inbatadna a babaen kadagiti maaw-awatda a tulong ket adda ti mausar iti panangsupusop kadagiti gastosenda iti panagpaagas iti apokona.
Kunana a ti Dios ti mangsubad kadagiti amin a tattao a saan a nagpangadua a timmulong kadakuada iti kanito a nga agkasapulanda unay ti tulong pinansial.
Mainaig iti daytoy, personal nga inyawat ni Engr. Michael Patrick Alcantara, ti Kind Hearts of Ilocos ti 150 a ribu a pisos ken ni Lola Lorna a dakkel a nayon a tulong daytoy kadakuada.
Inpakaammo ni Engr. Alcantara a daytoy a naukkonda a kuarta ket manipod kadagiti pagayamna nga adda iti ballasiw-taaw ken dadduma pay a saandan a kayat a nagpainagan.
Inpanamnamana a no addanto pay ti mangted ket dagusda daytoy nga idanon iti pamilia ti maseknan a maladaga.
Maipalagip a naarestar ti ama ti maladaga babaen iti naisayangkat nga anti-illegal drug buy-bust operation iti ili ti Solsona.
